काठमाडौं । साफ च्याम्पियनसिप फुटबल प्रतियोगितामा नेपालले माल्दिभ्सविरुद्द गोलको वर्षा गरेको छ ।
हिजो साँझ दशरथ रंगशालामा भएको खेलमा घरेलु टोली नेपालले माल्दिभ्सलाई ११-० गोलले पराजित गर्यो ।
नेपालको एक पक्षीय जितमा रेखा पौडेल र प्रिती राईको ह्याट्रिक गरिन । रेखाले पाँच गोल गरिन भने प्रितीले ३ गोल गरिन । त्यस्तै सविता राना मगर, अनिता केसी र अमिषा कार्कीले एक-एक गोल थपिन ।
नेपालले सुरुवातीबाटै दबाबमा राखेको खेलमा छैटौं मिनेटमा प्रिती राईको गोलमार्फत नेपालले अग्रता लिएको थियो । त्यसपछि १० मिनेटमा नेपालले ३-० को अग्रता बनाएको थियो । त्यसपछि खेलको ४२ औं मिनेटमा रेखाले व्यक्तिगत दोस्रो तथा चौथो गोल गरिन ।
खेलको पहिलो हाफमा माल्दिभ्सलाई दबाबमा राखेको नेपालले दोस्रो हाफमा पनि उत्कृष्ट प्रदर्शन गर्यो । दोस्रो हाफ सुरु भएको दुई मिनेटमै गोल गर्दै रेखाले ह्याट्रिक गरिन । खेलको ६२ औं मिनेटमा रेखाले र ६४ औं मिनेटमा प्रितीले गोल गर्दै नेपालको अग्रता फराकिलो बनाइन ।
यसपछि पनि नेपालले गोलको वर्षा जारीराखेको थियो । ८७ औं मिनेटमा प्रितीले पेनाल्टी मार्फत ह्याट्रिक पूरा गरिन भने रेखाको स्थानमा मैदान छिरेकी अमिषा कार्कीले टीमका लागि ११ औं गोल गरेकी थिइन ।
नेपालले यस अघि समुहको पहिलो खेल गोलरहित बराबरीमा रोकिएको थियो ।
