नवलपरासी पूर्व । नवलपरासी पूर्वमा छोराले ढुंगा प्रहार गरी बाबुको हत्या गरेका छन् ।
जिल्लाको कावासोती नगरपालिका– ५ ठकुरीचोकमा आज बिहान बुवा छोराबीच झगडा हुँदा छोरा निराजन कुमालको ढुंगा प्रहारबाट बुबा ४३ वर्षीय प्रेम कुमालको हत्या भएको हो ।
बुबा प्रेमको कुटाइबाट घरमा पालेको कुकुरको मृत्यु भएपछि प्रेम र छोरा निराजनबीच विवाद भएको जिल्ला प्रहरी कार्यालयका डिएसपी बेद पौडेलले जानकारी दिए । सोही विषयमा विवाद भएपछि निराजनले बुवा प्रेममाथि ढुंगा प्रहार गरेका थिए ।
प्रहरीका अनुसार ढंगा टाउकोमा लाग्दा प्रेमको घटनास्थलमै मृत्यु भएको थियो । घटनाबारे जानकारी पाएपछि प्रहरीले छोरा निराजनलाई पक्राउ गरेको र यस विषयमा थप अनुसन्धान भैरहेको डिएसपी पौडेलले बताए ।
