विराटनगर । विराटनरस्थित महेन्द्र मोरङ आदर्श बहुमुखी क्याम्पसका विद्यार्थीहरुले प्रदेश योजना आयोगको गाडीमा आगजनी गरेका छन् ।
रङ्गेली नगरपालिकाका कार्यवाहक मेयर र प्रमुख प्रशासकीय अधिकृतलाई दुर्व्यवहार गरेको आरोपमा पक्राउ परेका विद्यार्थीहरुको रिहाईको लागि प्रदर्शनमा उत्रिएका विद्यार्थीहरुले आज सरकारी गाडीमा आगजनी गरेका हुन् ।
प्रदेश योजना आयोगका उपाध्यक्ष डा. राजेन्द्र अधिकारी चढेको १ झ ६४४ नम्बरको स्कारपीयो गाडीमा विद्यार्थीहरुले आगजनी गरेका हुन् । त्यस्तै, विराटनगरको कञ्चनजंघा पार्टी प्यालेसमा पार्किङमा राखिएको अन्य पाँच वटा गाडीमा समेत तोडफोड भएको छ ।
पर्खाल नाघेर आएका करिब ९ जनाको समूहले तोडफोड गरेर फरार भएको प्रहरीले जनाएको छ । प्रहरीका अनुसार घटनामा संलग्नको खोजी कार्य भैरहेको छ ।
गृहमन्त्री रवि लामिछानेसहित सुरक्षा प्रमुखहरु विराटनगरमै भएको बेला यो घटना भएको हो । आजदेखि सुरु हुने दुई दिने राष्ट्रिय सुरक्षा गोष्ठिमा सहभागी हुन गृहमन्त्रीसहित सुरक्षा अधिकारीहरु विराटनगर आएका थिए ।
