काठमाडौं । दाङमा नेपाली सेनाका अमलदार (जवान) ले श्रीमतीको हत्या गरेका छन् ।
नेपाली सेनाका अमलदार ३६ वर्षीय शालिकराम बुढाथोकीले आफ्नी २७ वर्षीया श्रीमती टीका बुढाथोकीको हत्या गरेको प्रहरीले जनाएको छ । शालिकरामले दाङको तुल्सीपुर उपमहानगरपालिका– ६ कोठामै धारीले हतियार प्रहार गरेर श्रीमती टीकाको हत्या गरेको खुलेको इलाका प्रहरी कार्यालय तुल्सीपुरका प्रहरी निरीक्षक प्रवक्ता प्रकाश थापाले जानकारी दिए ।
प्रहरीका अनुसार शालिकराम र टीकाबीच जेठ १४ गते मात्र छोडपत्र भएको थियो । छोडपत्र भए पनि केही लेनदेन बाँकी रहेको र आफ्नो सामान लिन भन्दै शालिकराम आज टीकाको कोठामा गएको र त्यहाँ विवाद भएपछि घटना घटेको हो ।
आक्रमणबाट जोगिँदै टिका आफ्नो कोठा भएको घरबाट भागेर छिमेकी तुल्सीराम ओलीको घरको पहिलो तलाको कौसीमा पुगेकी थिइन् । शालिकराम त्यही पुगेर हतियार प्रहार गरेर हत्या गरेको प्रहरीले जनाएको छ ।
सल्यानको कपुरबोट गाउँपालिका– ६ घर भएका शालिकराम ज्वालादल गण बारामा कार्यरत थिए । श्रीमती टीकाको हत्या गरेका उनलाई हाल इलाका प्रहरी कार्यालय तुल्सीपुरले नियन्त्रणमा लिएर थप अनुसन्धान गरिरहेको छ ।
