काठमाडौं । अमेरिकाको नयाँ राष्ट्रपतिमा रिपब्लिकन उम्मेदवार डोनाल्ड ट्रम्प निर्वाचित भएका छन् ।
ट्रम्पले डेमोक्रेटिक पार्टीकी उम्मेदवार उपराष्ट्रपति कमला ह्यारिसलाई पराजित गर्दै अमेरिकाको ४७ औं राष्ट्रपतिमा निर्वाचित भएका हुन् । रिपब्लिकन उम्मेदवार ट्रम्पले २७७ इलेक्टोरल मत प्राप्त गरेका छन् भने ह्यारिसले २२४ इलेक्टोरल मत प्राप्त गरेकी छन् ।
अमेरिकी राष्ट्रपतिमा निर्वाचित हुन् ५ सय ३८ मध्ये कम्तीमा २७० इलेक्टोरल मत ल्याउनुपर्छ । ट्रम्पले अमेरिकी इतिहासमा १३२ वर्षपछि पहिलो प्रयासमा राष्ट्रपति बनेर दोस्रो निर्वाचन हार्दै तेस्रो प्रयासमा फेरि राष्ट्रपति निर्वाचित भएका हुन् ।
व्यक्तिगत रुपमा उनको यो दोस्रो कार्यकाल हुनेछ । सन् २०१६ मा पहिलो पटक राष्ट्रपतिमा निर्वाचित भएका ट्रम्प २०२० को चुनावमा भने जो डेमोक्र्याट उम्मेदवार जो बाइडेनसँग पराजित भएका थिए ।
ट्रम्प राष्ट्रपतिमा निर्वाचित भएसँगै उनलाई नेपालका राष्ट्रपति रामचन्द्र पौडेलसहित विभिन्न देशका नेताहरुले बधाई दिएका छन् ।
