काठमाडौं । क्रिकेटर सन्दीप लामिछानेविरुद्ध बलात्कारको आरोप लगाउँदै आएकी गौशाला– २६ ले उच्च अदालतको फैसलाविरुद्ध सर्वाेच्च अदालतमा पुनरावेदन नगर्ने भएकी छन् ।
गौशाला– २६ ले सरकारी वकिल कार्यालयलाई निवेदन लेख्दै मुद्दालाई थप अगाडी नबढाउन आग्रह गरेको सरकारी वकिल कार्यालय स्रोतले जनाएको छ । उनले महान्यायाधीवक्ताको कार्यालयलाई पनि निवेदन दिएको जनाइएको छ ।
उनले बुधवार महान्यायाधीवक्तालाई भेटेर निवेदन दिएकी थिइन् भने आज उच्च सरकारी वकिल कार्यालय पुगेर निवेदन दर्ता गराएकी हुन् । सरकारी वकिलमा दर्ता नम्बर ३३२ रहेको छ । सरकारी वकिल कार्यालयका अनुसार उनले यो मुद्दाले आफूलाई सामाजिक र मानसिक रुपमा धेरै गाह्रो परेकाले पुनरावेदन नगर्दिनु भन्ने आशयको निवेदन दिएको जनाइएको छ ।
यस अघि गौशाला– २६ ले हालेको मुद्दाका आधारमा जिल्ला अदालत काठमाडौंले सन्दीपलाई दोषी ठहर गरेको थियो । तर, जिल्लाको सो फैसला उल्टाउँदै उच्च अदालतले सन्दीपलाई सफाई दिएको छ ।
उच्च अदालतले सफाई दिए पनि लामिछानेविरुद्धको मुद्दामा सर्वाेच्च अदालतमा पुनरावेदन गर्ने बाटो खुल्ला रहेको छ । तर पीडित युवती गौशाला– २६ ले नै पुनरावेदन नगर्न भनेर सरकारी वकिल कार्यालय र महान्यायाधीवक्ताको कार्यालयमा निवेदन दिएकी हुन् ।
सरकारी वकिल कार्यालयका एक अधिकारीले भने पुनरावेदन गर्ने कि नगर्ने भन्ने विषयमा निर्णय गर्ने सरकारी वकिलले मात्रै रहेको बताए । “पीडितले निवेदन दिँदैमा मुद्दा अघि बढ्ने वा नबढ्ने भन्ने हुँदैन हामीले मिसिल फाइल र तथ्य प्रमाण हेरेर निर्णय गछौं,” ती अधिकारीले भने ।
यो मुद्दामा अदालतबाट फैसलाको पूर्णबाट बिहिवार मात्रै प्राप्त भएकाले थप अध्ययन गरेर पुनरावेदन गर्ने वा नगर्ने भन्ने विषयमा निर्णय गर्ने उनले बताए ।
