नेपाल प्रीमियर लिग (एनपीएल) मा 'डिसिजन रिभ्यु सिस्टम' (डिआरएस) प्रविधिको प्रयोग गरिने भएको छ ।
एनपीएलको आधिकारिक पेज मार्फत विजया दशैंको शुभकामना दिँदै एनपीएलको यस सिजनमा डिआरएसको प्रयोग गरिने जानकारी दिएको हो । डिआरएसको प्रयोग नेपाली क्रिकेटमा एउटा नयाँ कोसेढुङ्गा भएको बताइएको छ ।
यस अघि क्यानका सचिव पारस खड्काले एनपीएलमा डिआरएस प्रविधि ल्याउने बारेमा आवश्यक पहल भैरहेको जानकारी दिएका थिए भने आईसीसीले एनपीएललाई औपचारिक मान्यता दिएमा डिआरएस सम्भवतः डिआरएस ल्याउने बताएका थिए ।
आईसीसीले एनपीएललाई आधिकारिक रुपमा मान्यता दिएसँगै डिआरएस प्रविधिको प्रयोग गरिने भएको हो । डिआरएस प्रविधि पछिल्लो समय क्रीकेटमा प्रयोग हुँदै आएको चर्चित प्रविधी हो ।
डिआरएस प्रयोग हुने भएपछि खेलको निष्पक्षता र निर्णयको विश्वसनीयता बढ्ने अपेक्षा गरिएको छ।
डीआरएस लागू भएपछि अम्पायरको निर्णयमा असहमति भए खेलाडीले नियमअनुसार त्यसलाई चुनौती दिन सक्नेछन्।
प्रविधिको सहायताले एलबीडब्लू, क्याच र अन्य महत्त्वपूर्ण निर्णय पुनरावलोकन गर्न सकिने भएकाले गलत निर्णयबाट खेलको नतिजामा पर्न सक्ने प्रभावसमेत कम हुनेछ।
यसले खेललाई थप प्रतिस्पर्धात्मक र विश्वसनीय बनाउनुका साथै नेपाली क्रिकेटलाई अन्तर्राष्ट्रिय स्तरको प्रविधि र अभ्याससँग जोड्न सहयोग पुग्नेछ।
