काठमाडौं । अमेरिकी राष्ट्रपति डोनाल्ड ट्रम्पले सबैलाई इरानको राजधानी तेहरान खाली गर्न चेतवानी दिएका छन् ।
इरान र इजरायलबीच जारी युद्धकाबीच सामाजिक सञ्जाल ‘ट्रुथ सोसल’ मा एक स्टाटस जारी गर्दै राष्ट्रपति ट्रम्पले सबैलाई तुरुन्त तेहरान खाली गर्न चेतावनी दिएका हुन् ।
ट्रम्पले लेखेका छन्, “मैले हस्ताक्षर गर्न भनेको ‘सम्झौता’ मा इरानले हस्ताक्षर गर्नुपर्थ्यो। कस्तो लाजमर्दो कुरा, र मानव जीवनको बर्बादी। सरल भाषामा भन्नुपर्दा, इरानसँग आणविक हतियार हुन सक्दैन। मैले यो बारम्बार भनें ! सबैले तुरुन्तै तेहरान छोड्नुपर्छ !”
ट्रम्पले तेहरान खाली गर्नुपर्छ भनेर गरिएको पोष्टले इरानले चाँडै वार्तामा बस्नुपर्छ भनेर दबाब दिन खोजेको अन्तर्राष्ट्रिय सञ्चार माध्यमले जनाएका छन् । क्यानडाको अल्बर्टामा जारी जी– ७ को शिखल सम्मेलनमा सहभागी हुन ट्रम्प क्यानडा पुगेका छन् । जी–७ को शिखर सम्मेलनमा भए पनि ट्रम्पले सोमबारदेखि नै इजरायल–इरानबीच भैरहेको युद्धको बारेमा निरन्तर अपडेट लिइरहेको जनाइएको छ ।
ह्वाइट हाउसका प्रेस सचिव कारोलिन लेभिटका अनुसार ट्रम्पले जी– ७ को शिखल सम्मेलनमा भाग लिएर तस्बीर लिनेछन् र क्यानडाको अल्बर्टामा शिखर सम्मेलनमा नेताहरूसँग खाना खानेछन्, निर्धारित समयभन्दा एक दिन अगाडि नै अमेरिका फर्केछन् ।
ट्रम्पले दिएको तेहरान खाली गर्ने चेतावनी पछि एकतार्फ दुई देशबीच जारी युद्धमा अमेरिका पनि सहभागी हुन थालेको हो की भन्ने आशंका बढाएको छ भने अर्काे तर्फ इरानलाई वार्तामा आउन दबाब स्वरुप उनले यस्तो पोष्ट गरेका हुन भन्ने पूर्वानुमान गर्न थालिएको छ ।
अमेरिकाको वाशिंगटन डीसीस्थित थिंक ट्यांक सेन्टर फर इन्टरनेशनल पोलिसिका कार्यकारी उपाध्यक्ष म्याथ्थु डसले तेहराका सम्पूर्ण जनताले सहर खाली गर्नु पर्छ भन्ने ट्रम्पको चेतावनी डरलाग्दो भएको उल्लेख गरेका छन् ।
