काठमाडौं । जिउँदै इटाभट्टमा मान्छे जलाएको आरोपमा जिल्ला अदालतबाट जन्मकैदको सजाय भोगीरहेका नेपाली कांग्रेसका नेता तथा पूर्वसांसद मोहम्मद अफताब आलमलाई सफाइ दिने उच्च अदालत उच्च अदालत अस्थायी इजलास वीरगन्जका न्यायाधीशद्वय खुसीप्रसाद थारु र अर्जुन महर्जनलाई कालोमोसो दलिएको छ ।
बिहिवार दिउँसो अदालतको इजलासभित्रै (कार्यकक्षमा) रहेका न्यायाधीशद्धय थारु र महर्जनमाथि नेकपा (बहुमत) का कार्यकर्ताहरुले कालोमोसो दलेका हुन् । न्यायाधीशद्धय थारु र हर्जनमाथि कालोमोसो दलेको आरोपमा प्रहरीले अदालत परिसरबाट तीन जनालाई नियन्त्रणमा लिएको छ ।
पक्राउ पर्नेमा अविनाश भन्ने किशोर कुँवर, गर्बुज र बिहानी रहेका छन् । उनीहरु तीनै जना नेकपा (बहुमत) का केन्द्रीय सदस्य हुन् । पक्राउ परेका तीनै जनालाई जिल्ला प्रहरी कार्यालय पर्साको हिरासतमा राखिएको प्रहरीले जनाएको छ ।
न्यायाधीशद्वय थारु र महर्जनले आलमलाई सफाइ दिन गरेको फैसलाको चौतर्फी आलोचित भइरहेकै समयमा नेकपा (बहुमत) ले कालोमोसो दलेको हो ।
इँटा भट्टामा हालेर मान्छेलाई जिउँदै जलाएको कसुरमा ६ वर्षदेखि जेलमा रहेका आलमलाई उच्च अदालत अस्थायी इजलास वीरगन्जले यही जेठ १४ गते सफाइ दिएको थियो। रौतहट जिल्ला अदालतको फैसलालाई उल्ट्याउँदै उच्च अदालत वीरगन्जका न्यायाधीशद्वय थारू र महर्जनको संयुक्त इजलासले जेठ १४ गते आलमलाई सफाइ दिएको हो। त्यही दिन उनी नक्खु कारागारबाट रिहा समेत भएका थिए।
