काठमाडौं । भारत–पाकिस्तान तनावबारे नेपालले आधिकारीक धारणा सार्वजनिक गरेको छ ।
बिहिवार परराष्ट्र मन्त्रालयले एक विज्ञप्ति जारी गरेर भारत–पाकिस्तान तनावबारे आधिकारीक धारणा सार्वजनिक गरेको हो । परराष्ट्र मन्त्रालयले जारी गरेको विज्ञप्तिमा आतंकवादविरुद्ध नेपाल सरकारको दृढ अडान रहेको उल्लेख गरिएको छ ।
“नेपालले सबै प्रकारका आतंकवादविरुद्ध दृढ अडानस्वरुप बर्बर आतंकवादी आक्रमणको तत्काल र स्पष्टरूपमा निन्दा गर्दै आएको छ। आतंकवादविरुद्धको लडाईँमा नेपाल सबैको साथमा उभिएको छ,” विज्ञप्तिमा भनिएको छ।
गत अप्रिल २२ मा भारतको पहलगाममा एक नेपालीसहित निर्दाेष पर्यटकमाथि आतंकवादी आक्रमण भएको र त्यसले सिर्जित भारत र पाकिस्तानबीचको तनावप्रति नेपाल सरकार गहिरो चिन्तित रहेको विज्ञप्तिमा उल्लेख गरिएको छ ।
विज्ञप्तिमा भनिएको छ, “उक्त दुःखद् समयमा पनि नेपाल भारतको साथमा उभिएको थियो । आतंकवादविरुद्ध हाम्रो बलियो साथ छ ।” सरकारले नेपाली भूमिलाई छिमेकी देशहरुविरुद्ध प्रयोग हुन नदिने पनि बताएको छ ।
विज्ञप्तिमार्फत् नेपाल सरकारले भारत र पाकिस्तानबीचको तनाव कम हुनेमा आशा पनि गरेको छ । पहलगाममा एक नेपालीसहित २६ जनाको ज्यान जाने गरी भएको आतंककारी आक्रमणपछि भारतले पाकिस्तानमाथि हवाई आक्रमण गरेको छ ।
‘अप्रेशन सिन्दूर’ नाम दिएर भारतले गरेको हवाई आक्रमणमा परेर पाकिस्तानले ३१ जनाको मृत्यु र ४६ जना घाइते भएको बताएको छ। भारतले पनि पाकिस्तानतर्फबाट गोलीबारीमा १५ भारतीयको मृत्यु भएको बताएको छ।
हेर्नुहोस पराष्ट्र मन्त्रालयले जारी गरेको विज्ञप्तीको पूर्णपाठः
