काठमाडौं । भौतिक पूर्वाधार तथा यातायात मन्त्रालयले बाढी/पहिरोका कारण अवरुद्ध भएको बीपी राजमार्ग दशैं अगाडी खुल्ने सम्भावना नरहेको जनाएको छ ।
बिहिवार मन्त्रालयमा आयोजित पत्रकार सम्मेलनमा सचिव केशव कुमार शर्माले अवरुद्ध भएको बीपी राजमार्ग दशैंअगाडी सञ्चालनमा ल्याउन नसकिने बताए । उनले मन्त्रालयको टोलीले स्थलगत अवलोकन समेत गरेको आएको र दशैं अगाडी खुलाउने सम्भावना नरहेको बताए ।
पत्रकार सम्मेलनमा सचिव शर्माले भने, “बीपी राजमार्गको अवस्था हेर्दा खेरी दशैं अगाडी त्यो खुल्ने सम्भावना रहेको छैन् । हामी त्यो निष्कर्षमा पुग्यौं । काम निरन्तर गछौं, किनकी त्यहाँ गाडीहरु रहेका छन् । गाडीको स्टाफहरुले कुरिरहनु भएको छ । सकेसम्म हामी प्रयास गर्छाैं दशैं अगाडी अड्कीएका गाडीहरु ल्याउने प्रयास गर्छाै । त्यो उद्धार हुन्छ । सार्वजनिक गाडी छोड्ने गरी नै गर्न सकिने अवस्था हामी देख्दैनौं । किनकी धेरै ठाउँमा सडक बिग्रीएको छ ।”
असोज ११ र १२ गतेको भारी वर्षाका कारण देशभरका ३४ वटा राजमार्गका ८०५ स्थानमा पहिरो गई सडक अवरुद्ध भएको सचिव शर्माले जानकारी गराए । त्यसमध्ये ७४४ स्थानको पहिरो हटाएर १९ वटा राजमार्गमा विभागीय तथा भाडाका यन्त्र उपकरण र जनशक्ति परिचालन गरी यातायात सुचारु गरिसकिएको उनले बताए ।
हाल ५ वटा मुख्य राजमार्गका ३१ स्थानमा अवरुद्ध भएको यातायात सञ्चालन गर्ने प्रयास जारी राखिएको उनले बताए। हालसम्मको प्रारम्भिक अनुमान अनुसार सडक तथा पुलतर्फ अस्थायी यातायात चालु गर्न मात्र साढे २ देखि ३ अर्ब लाग्ने देखिएको उनले जानकारी दिए।
त्यस्तै क्षति भएका सम्पूर्ण संरचना स्थायी रूपमा पुनःस्थापना गर्न २० देखि २५ अर्ब रुपैयाँ लाग्ने अनुमान गरिएको उनको भनाइ छ।
