काठमाडौं । राष्ट्रिय योजना आयोगको उपाध्यक्षमा शिवराज अधिकारी नियुक्त भएका छन् ।
आज बसेको मन्त्रीपरिषद्को बैठकले अधिकारीलाई राष्ट्रिय योजना आयोगको उपाध्यक्षमा नियुक्त गर्ने निर्णय गरेको हो । मन्त्री परिषद् बैठकका निर्णय सुनाउँदै सरकारका प्रवक्ता तथा सञ्चार तथा सूचना प्रविधिमन्त्री पृथ्वी सुब्बा गुरुङले योजना आयोगको उपाध्यक्षमा अधिकारीलाई नियुक्त गर्ने निर्णय भएको जानकारी दिए ।
त्रिभुवन विश्वविद्यालयका अर्थशास्त्र विभाग प्रमुख रहेका अधिकारी यस अघि पनि योजना आयोगको सदस्य थिए । मन्त्रीपरिषद् बैठकले योजना आयोगमा नयाँ सदस्य नियुक्त गरेको प्रवक्ता गुरुङले बताए ।
त्यस्तै आयोगको सदस्यमा आरपी विच्छा, रमेश सिंह, प्रकाश श्रेष्ठ, गीताकुमारी पौडेल, जयबहादुर टण्डन र गंगादत्त अवस्थीलाई नियुक्त गर्ने निर्णय भएको उनले बताए ।
