काठमाडौंं । सरकारले कायममुकायम मुख्य सचिव लीलादेवी गड्तौलालाई मुख्य सचिव नियुक्त गरेको छ ।
बिहिवार प्रधानमन्त्री तथा मन्त्रीपरिषद्को कार्यालय सिंहदरबारमा बसेको मन्त्रीपरिषद्को बैठकले गड्तौलालाई मुख्य सचिव नियुक्त गर्ने निर्णय गरेको हो । उनी नेपालको पहिलो महिला मुख्य सचिव बनेकी छन् ।
नेपालको इतिहासमा २६ जना मुख्य सचिवले प्रशासनिक कमाण्ड सम्हाल्दा यो पटक पहिलो पटक महिलाले नेतृत्व पाएको हो । मुख्य सचिव बैकुण्ठ अर्यालमाथि भ्रष्टाचार मुद्दा दायर भएपछि उनी निलम्बनमा छन् ।
अर्याललाई गत असार १० गते राष्ट्रिय योजना आयोगमा राजपत्रांकित विशिष्ट श्रेणीको मुख्य सचिव सरहको विशेष पद सिर्जना गरी उक्त पदमा सरुवा गर्ने निर्णय भएको थियो । त्यस पछि प्रधानमन्त्री कार्यालयमा कानुन मामिला हेर्ने सचिव गड्तौलाले वरीष्ठताका आधारमा स्वतः निमित्त मुख्य सचिवको जिम्मेवारी पाएकी थिइन् ।
२०५२ सालमा शाखा अधिकृतबाट निजामती सेवामा प्रवेश गरेकी उनी आउँदो भदौ २५ गते उमेर हदका कारण अवकाशमा जानेछिन् । त्यसैले गड्तौलाले अब ३५ दिन मुख्य सचिवको जिम्मेवारी सम्हाल्नेछिन् ।
