दाङ । राप्ती नदीमा बगेर बेपत्ता भएका दुई जनाको शव फेला परेको छ ।
शनिबार राती आएको बाढीमा परेर लमही नगरपालिका– ७ नयाँ बस्तीका ६२ वर्षीय मणिराम चौधरी र लमही नगरपालिका– ८ बगरापुरबाट बगेर बेपत्ता भएका थिए । उनको शव आज बिहान खोलाको किनारामा फेला परेको इलाका प्रहरी कार्यालय अमिलीयाका प्रहरी प्रमुख लालबहादुर श्रेष्ठले जानकारी दिए ।
त्यस्तै दूध बिक्री गरेर घर फर्किने क्रममा लमही नगरपालिका– ७ हस्नापुर गाउँबाट राप्ती नदीको बाढीमा बगेर बेपत्ता भएका राजापुर गाउँपालिका– २ का १७ वर्षीय राजकुमार यादवको पनि खोलाको बगरमा शव फेला परेको प्रहरीले जनाएको छ ।
हस्नापुर घाटबाट सोही ठाउँका ४८ वर्षीय तुलाराम यादव र ४० वर्षीय दयाराम यादवको भने सशस्त्र प्रहरी बल नेपाल नं ४१ रिजर्भ गण अर्जुनखोलाबाट खटिएको टोलीले सकुशल उद्धार गरेको थियो ।
