जनकपुरधाम । मधेश प्रदेशका नवनियुक्त मुख्यमन्त्री सतिश कुमार सिंहले शपथ लिएका छन् ।
प्रदेश प्रमुख सुमित्रा सुवेदी भण्डारीले शुक्रबार मध्यान्ह्र मुख्यमन्त्री सिंहलाई पद तथा गोपनियताको शपथ गराएकी हुन् । जनमत पार्टीका सांसद सिंह आजै मधेश प्रदेशको मुख्यमन्त्री नियुक्त भएका हुन् ।
सिंह संविधानको धारा १६८ को २ बमोजिम मुख्यमन्त्रीमा नियुक्त भएका हुन् । सतिश सत्ता गठबन्धनमा रहेका ६ राजनीतिक दलका ५५ जना सांसदको समर्थनमा मुख्यमन्त्रीमा नियुक्त भएका हुन् ।
उपेन्द्र यादव नेतृत्वको जसपा नेपाल केन्द्र गठबन्धनबाट बाहिरिएपछि जसपा नेपालका मुख्यमन्त्री सरोज कुमार यादवले बुधवार प्रदेशसभामा विश्वासको मत गुमाएर पदमुक्त भएका थिए ।
यादव पदमुक्त भएसँगै प्रदेश प्रमुख भण्डारीले नयाँ सरकार गठनका लागि बहुमत सांसदको हस्ताक्षरसहित मुख्यमन्त्रीमा दाबी पेश गर्न आज बिहान १० बजेसम्मको समय दिएर आह्वान गरेकी थिइन् ।
