काठमाडौं । संवैधानिक परिषद्ले सर्वोच्च अदालतको रिक्त प्रधानन्यायाधीश पदमा डा. मनोज कुमार शर्माको नाम सिफारिस गरेको छ ।
प्रधानमन्त्री बालेन्द्र शाह (बालेन) को अध्यक्षतामा बसेको परिषद्को बैठकले ३३ औँ प्रधानन्यायाधीशको रुपमा न्यायाधीश शर्मालाई नियुक्त गर्ने निर्णय गरेको हो । नेपालको न्यायीक इतिहासिमा वरिष्ठतम् न्यायाधीशको सट्टा रोलक्रमको चौथो तहमा रहेका रहेका न्यायाधीश प्रधानन्यायाधीका लागि सिफारिस भएको यो पहिलो घटना हो ।
तत्कालीन प्रधानन्यायाधीश प्रकाशमानसिंह राउतले अवकाश पाएपछि सर्वाेच्च अदालत कायममुकायमको भरमा चलिरहेको थियो । वरिष्ठतम् न्यायाधीश सपना प्रधान मल्लले कायम मुकायम प्रधानन्यायाधीशको जिम्मेवारी सम्हाली रहेकी थिइन् ।
न्यायापरिषद्को बैठकले यस अघि प्रधानन्यायाधीशका लागि योग्यता पुगेका सर्वाेच्च अदालतका ६ जना स्थायी न्यायाधीशको सूची पठाएको थियो । फागुन २६ मा न्यायापरिषद्को बैठकले नयाँ प्रधानन्यायाधीशका लागि वरिष्ठतम् न्यायाधीश सपना प्रधान मल्ल, न्यायाधीशहरु कुमार रेग्मी, हरिप्रसाद फुयाँल, मनोज कुमार शर्मा, नहकुल सुवेदी र तिलप्रसाद श्रेष्ठको नाम पठाएको थियो ।
यस अघि संवैधानिक परिषद्ले न्यायपरिषद्को सिफारिस बमोजिम वरिष्ठतम् न्यायाधीशलाई प्रधानन्यायाधीशकामा नियुक्त गर्ने परम्परा रहेको थियो । तर, अहिले रास्वपाका वरिष्ठ नेता बालेन्द्र शाहको नेतृत्वमा नयाँ सरकार निर्माण भएसँगै गठन भएको संवैधानिक परिषद्को बैठकले चौथो नम्बरमा नाम सिफारिस भएका शर्मालाई प्रधानन्यायाधीशका लागि सिफारिस गरेको हो ।
संवैधानिक परिषद्ले नाम सिफारिस गरिसकेपछि अब संसदीय सुनुवाई समितिले सुनुवाइ गर्नेछ । समितिले सुनुवाइबाट अनुमोदन गरेपछि राष्ट्रपतिले प्रधानन्यायाधीश नियुक्त गर्नेछन् । सुनुवाइका लागि भने केही समय लाग्ने छ ।
