काठमाडौं । ललितपुरको गोदावारी नगरपालिका– ४ स्थित आनन्द वनमा लागेको डडेलो निभाउने क्रममा घाइते भएका एक जनाको मृत्यु भएको छ ।
आगो निभाउने क्रममा दुई जना घाइते भएको र घाइते मध्ये एक जनाको मृत्यु भएको जिल्ला प्रहरी कार्यालय ललितपुरले जनाएको छ । मृत्यु हुनेमा स्थानीय शंकर पहरी रहेका छन् ।
प्रहरीका अनुसार मंगलबार आगो निभाउने क्रममा घाइते हुनेमा शंकरसँगै अर्का स्थानीय रमेश पहरी रहेका थिए । दुवै जनालाई उपचारको लागि किर्तिपुरस्थित बर्न अस्पतालमा लगिएको थियो । शंकरको उपचारको क्रममा अस्पतालमा मृत्यु भएको हो ।
अर्का घाइते रमेश पहरीको भने सोही अस्पतालमा उपचार भैरहेको छ । आनन्द वनमा डडेलो लागेपछि नजिकैको कुष्ठरोग अस्पताल सम्म आउन सक्ने भएकाले त्यहाँका बिरामीलाई अन्यन्त्र सारिएको थियो ।
