काठमाण्डौं । प्रमुख प्रतिपक्षी दल नेकपा (माओवादी केन्द्र) ले ‘जनतासँग माओवादी, तराई–मधेस जागरण अभियान’ स्थगित गरेको छ ।
राष्ट्रिय राजनीतिलाई मध्यनजर गरेर अभियान स्थगित गर्नु परेको माओवादी केन्द्रका महासचिव देव गुरुङले जानकारी दिए । अभियान अन्तर्गत आज माओवादी केन्द्रका अध्यक्ष पुष्पकमल दाहाल ‘प्रचण्ड’ सहितका शिर्ष नेताहरु रौतहटमा आयोजित कार्यक्रममा सहभागी भएका थिए ।
अभियानकै क्रममा माओवादीका नेताहरुको अनौपचारिक बैठकपछि अभियानलाई केही दिन स्थगित गर्ने निर्णय गरेको जनाइएको छ । अभियान स्थगित गरेसँगै माओवादीका शिर्ष नेताहरु आजै संघीय राजधानी काठमाडौं फर्किने बताइएको छ ।
माओवादी केन्द्रले फागुन १२ गतेदेखि झापाबाट एक महिने जागरण अभियान सुरु गरेको थियो । शिर्ष नेताहरु काठमाडौं फर्किपछि आइतबार पार्टीको पदाधिकारी बैठक बस्नेछ । सरकारको गलत रबैयाका कारण पश्चागामी शक्तिहरु सल्बलाउन थालेको माओवादीको निष्कर्ष रहेको एक नेताले जानकारी दिए । उनका अनुसार यो विषयमा पार्टीको पदाधिकारी बैठकमा गम्भिर छलफल हुनेछ ।
पछिल्लो समय देशमा राजावादीहरुले सक्रियता बढाएका छन् । पूर्वराजा ज्ञानेन्द्र शाह भोली पोखराबाट काठमाडौं आउने तयारी छ । उनको स्वागतको लागि राप्रपासहितका राजावादीहरुले सर्वसाधरणलाई एरपोर्टमा सहभागी हुन अपिल गरेका छन् ।
एक महिने जागरण अभियान लिएर तराई–मधेश झरेको नेकपा (माओवादी केन्द्र) ले एक्कासी अभियान नै स्थगित गरेर शिर्ष नेताहरु काठमाडौं फर्किनुलाई निकै चासोका साथ हेरिएको छ ।
