काठमाडौं । बालुवाटारबाट पक्राउ परेका राष्ट्रिय स्वतन्त्र पार्टी (रास्वपा) का सांसदसहित नेता, कार्यकर्ता रिहा भएका छन् ।
पार्टी सभापति रवि लामिछानेलाई रिहा गर्न माग गर्दै आज रास्वपाले प्रधानमन्त्री निवास बालुवाटारमा प्रदर्शन गरेको थियो । प्रदर्शनका क्रममा रास्वपाका सांसदसहित ५१ जना नेता, कार्यकर्ता पक्राउ परेका थिए ।
बालुवाटार घेराउ गर्न गएका उनीहरुलाई आज प्रहरीले पक्राउ गरेको थियो । पक्राउ पछि उनीहरुलाई छाड्ने निर्णय भएको जिल्ला प्रहरी परिसर काठमाडौंले जनाएको छ । सभापति लामिछाने सहकारी ठगी प्रकरणमा पक्राउ परेपछि रास्वपाले दिनहुँ विरोध प्रदर्शन गरिरहेको छ ।
बालुवाटार केन्द्रीत प्रदर्शनमा उत्रिएका रास्वपाका नेता, कार्यकर्ताले निषेधित क्षेत्र तोड्न खोजेपछि उनीहरुलाई प्रहरीले नियन्त्रणमा लिएको थियो । लामिछानेलाई सहकारी ठगी प्रकरणमा प्रहरीले कात्तिक २ गते पक्राउ गरेको थियो ।
