काठमाडौं । नेपाल एसीसी प्रिमियर कपमा समूह विजेता बन्दै सेमिफाइनलमा पुगेको छ ।
ओमानमा भैरहेको खेलमा नेपालले बुधवार साउदी अरेबियालाई ६ विकेटले पराजित गर्दै आफ्नो अपराजित यात्रा कायमै राखेको हो । पहिलो तीन खेल जितेर नेपाल यस अघि नै समूह ‘ए’ को विजेता भएर सेमिफाइनल पुगिससकेको थियो ।
आज साउदीसँगको जितले नेपालको शतप्रतिशत जितलाई कायम राखेको हो । आज पहिलो ब्याटिङ गरेर साउदीले दिएको ७४ रनको लक्ष्य पछ्याएको नेपालले १७.२ ओभरमा ४ विकेटको क्षतीमा पुरा ग¥यो । नेपालका गुल्सन झाले नट आउट ३२ रनको योगदान दिए भने कप्तान रोहित कुमार पौडेल १६ रनमा नट आउट रहे ।
त्यस्नै नेपालका अलराउण्डर दीपेन्द्रसिंह ऐरीले १७ रन बनाए भने आशिफ शेख र कुशल मल्ल २/२ रन बनाएर आउट भए । साउदीका इस्ताक अहमदले २ विकेट लिए भने उस्मान नाजिव र वाजी उल हसनले समान एक–एक विकेट लिए ।
पहिले ब्याटिङ गरेको साउदीका लागि ओपनर अब्दुल वाहिदले सर्वाधिक ३७ रन बनाएका थिए । साउदीका अन्य ब्याट्स्म्यानले भने दोहोरो रन बनाउन सकेनन् । बलिङतर्फ नेपालका करण केसी र अभिनाश बोहोराले समान २/२ विकेट लिए । त्यस्तै ललितनारायण राजवंशी र प्रतिश जिसीले समान एक–एक विकेट लिए ।
मंगलबार राती परेको पानीका कारण बुधवार बिहान पिच खेल्नको लागि तयार नहुँदा नेपाल र साउदीबीचको खेल ८/८ ओभरमा झारिएको थियो । नेपालले शुक्रबार समूह ‘बी’ को उपविजेतासँग सेमिफाइनल खेल्नेछ ।
