काठमाडौं । पूर्वप्रधानमन्त्री एवम् नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्डले नेकपा (एमाले) लाई एकता अभियानमा सामेल हुन अपील गरेका छन् ।
एमाले ओखलढुङ्गा जिल्ला समितिका नेताहरुलाई नेकपामा स्वागत गर्दै संयोजक प्रचण्डले मुलुकलाई संकटबाट जोगाउनका लागि राष्ट्रिय शक्ति आवश्यक रहेको र त्यसका लागि सबै वामपन्थी, कम्युनिष्ट र लोकतान्त्रिक शक्तिहरुबीचको एकता जरुरी रहेको बताएका छन् ।
उनले मुलुकलाई संकटबाट जोगाउनका लागि आफूहरुले पार्टीहरुबीचको एकता अभियानलाई तीव्रता दिएको समेत बताए । जेनजी पुस्ताले पनि आफ्नो एजेण्डा पूरा गर्न सक्ने पार्टी नेकपा नै रहेको बुझिसकेको संयोजक प्रचण्डको भनाई रहेको छ ।
एमालेमा रहेका देशभक्त र वामपन्थीहरु पनि नेकपामा समाहित हुने ढोका एमाले ओखलढुङ्गाले खोलिसकेको उनले बताए । उनले एमालेलाई कुनै पनि भ्रममा नपरी राष्ट्र निर्माणको अभियानमा लाग्न समेत आह्वान गरे ।
उनले भने, “राष्ट्रिय शक्ति निर्माणको यो महाअभियानमा सामेल हुन म एमालेलाई अपिल गर्न चाहन्छु । हामी सबैका लागि राष्ट्र भन्दा ठूलो अरु केही पनि छैन् । राष्ट्र संकटमा छ । नेपाली जनताको एकताले मात्रै मुलकुकको राष्ट्रियतालाई मात्रै मुलुकको राष्ट्रियतालाई सुदृढ गर्न सकिन्छ । वामपन्थी र कम्युनिष्टको एकताले नै राष्ट्रिय एकतालाई प्रवद्र्धन गर्न सक्दछ ।”
