काठमाडौं । नेकपा (एमाले) का नेता राजन भट्टराई कम्बोडिया प्रस्थान गरेका छन् ।
एमालेनेता भट्टराईले बुधबार साँझ सामाजिक सन्जाल फेसबुकमार्फत आफु कम्बोडिया प्रस्थान गर्न लागेको जानकारी गराएका छन् ।
उनले भोलीदेखी कम्बोडियामा सुरु हुने आइसीएपीपीको सम्मेलनमा स्थायी समितिको हैसियतले सहभागी हुन आज त्यस्तर्फ प्रस्थान गर्ने लागेको बताएका छन् ।
नेकपा एमालेले मंसिर ७ को जागरण सभाको संयोजकका रूपमा बागमती प्रदेश कमिटीका इन्चार्ज समेत रहेका नेता भट्टराईलाई तोकेको थियो । तर, आकस्मिक रुपमा उनी कम्बोडिया गएपछि त्यसलाई निकै चासोका रुपमा हेरिएको छ ।
मेडिकल व्यवसायी दुर्गा प्रसाईले एमाले अध्यक्ष समेत रहेका प्रधानमन्त्री केपी शर्मा ओलीको कम्बोडियामा लगानी रहेको प्रमाण फेला परेको दाबीसहित सामाजिक सन्जालमा सार्वजनिक गरेका थिए ।
ओलीको कम्बोडियामा लगानी रहेको दाबी गरेका दुर्गा प्रसाईंलाई प्रहरीले मंगलबार पक्राउ गरि अनुसन्धान अगाडी बढाएको छ । यही समयमा एमालेले मंसिर ७ गतेका लागि आयोजाना गरेको जागरण सभाका संयोजक भट्टराई नै पूर्वनिर्धारित कार्यक्रम छोडेर एक्कसी कम्बोडिया हानिएका हुन।
केपी ओलीको विश्वास पात्रसमेत मानिने भट्टराईले मंसिर ७ गतेको कार्यक्रमको जिम्मेवारी आफ्नो अनुपस्थितमा कैलाश धुङ्गेलले सम्हाल्ने जानकारी दिएका छन् ।
उनले सामाजिक सन्जाल फेसबुकमा लेखेका छन्, "क्यम्बोडियामा भोली देखि हुने ICAPP को १२ औं अधिवेशनमा स्थाई समितिको सदस्यका हैसियतले सहभागि हुनपर्ने भएकोले अहिले सॉझ त्यसतर्फ प्रस्थान गर्दैछु । मेरो मंसिर ७ कार्यक्रमको जिम्मेवारी मेरो अनुपस्थितिमा क. कैलाश ढुङ्गेलले सम्हाल्नुहुने जानकारी गराउन चाहन्छु।"
