काठमाडौं । सभामुख देवराज घिमिरेले नेकपा (एमाले) का सांसद योगेश भट्टराईले आज संसदमा सम्बोधनका क्रममा बोलेको शब्दमाथि छानबिन गर्न रुलिङ गरेका छन् ।
एमालेका सचिव समेत रहेका सांसद योगेश भट्टराईले संसदमा बोल्ने क्रममा माओवादीले सञ्चालन गरेको १० वर्षे ‘हिंसा’ का कारण मुलुकमा समयमा विद्युत उत्पादन भएको आरोप लगाएका थिए ।
सांसद भट्टलाईले संसदमा ‘हिंसा’ शब्द प्रयोग गरेपछि माओवादी केन्द्रका प्रमुख सचेतक हितराज पाण्डेले नियमापत्ति जनाएका थिए । माओवादी सांसदहरुले सम्बोधन गरिरहेको समयमा पनि सांसद भट्टराईले उक्त शब्द बोलिरहेका थिए ।
भट्टराईको शब्दमाथि नियमावत्ति जनाउँदै माओवादी सचेतक पाण्डेले भने, “नियमको उल्लंघन भैरहेको छ, यो संसदको नियमावलीको २६ मा नियमापत्तिको विषय छ । यहाँ नत दिइएको समयको पालना गरिएको छ नत संवैधानिक र नियमावलीमा भाषाको पालन गरिएको छ । यहाँ प्रयोग भएको भाषा संविधान, नियमावली अनुसार प्रयोग भैरहेको छैन् । त्यसकारण ‘हिंसा’ शब्दलाई रेकर्डबाट हटाउन माग गर्दछु ।”
माओवादी केन्द्रका प्रमुख सचेतक पाण्डेको नियमापत्ति पछि सभामुख देवाराज घिमिरेले सांसद भट्टराईले बोलेको शब्दमाथि छानबिन गर्नको लागि संसद सचिवालयलाई रुलिङ गरे । पाण्डेले नियमापत्ति जनाएको समयमा पनि एमाले सांसद भट्टराई र रघुजी पन्तले पटक–पटक उक्त शब्द दोहो¥याएका थिए ।
एमाले सांसदले संसदमा ‘हिंसा’ शब्दको प्रयोग गरेपछि माओवादी सांसद पाण्डेसहित, सुबोध सापकोटा लगायतले विरोध जनाएका थिए ।
