काठमाडौं । नेकपा (एमाले) का अध्यक्ष केपी शर्मा ओलीलाई प्रधानमन्त्री बनाउने प्रस्तावसहित एमाले र कांग्रेसका शिर्ष नेताहरु राष्ट्रपति भवन शितल निवास जाने तयारी गरेका छन् ।
प्रधानमन्त्री पुष्पकमल दाहाल ‘प्रचण्ड’ ले प्रतिनिधिसभामा विश्वासको मत नपाएर पदमुक्त भएसँगै एमाले र कांग्रेसका शिर्ष नेताहरु सांसदको हस्ताक्षरसहित ओलीलाई प्रधानमन्त्री बनाउने प्रस्ताव लिएर शितल निवास जान लागेका हुन् ।
नेपाली कांग्रेसका प्रवक्ता डा. प्रकाशशरण महतले एमाले अध्यक्ष केपी ओलीलाई प्रधानमन्त्री बनाउने प्रस्ताव लिएर आफूहरु राष्ट्रपति समक्ष जाने जानकारी दिए । प्रधानमन्त्री प्रचण्ड पदमुक्त भएसँगै संसद भवन बाहीर सञ्चारकर्मीहरुसँग कुरा गर्दै प्रवक्ता महतले यस्तो बताएका हुन् ।
उनले भने, “हामीले पहिलो चरणमा ओली जीलाई समर्थन गर्ने भनेका छौं । त्यसमा हामी प्रतिबद्ध छौं । त्यही अनुसार हाम्रो राष्ट्रपति कहाँ प्रस्ताव जान्छ ।”
ओलीलाई संविधानको धारा ७६ को २ अनुसार प्रधानमन्त्री बन्न समस्या नहुने उनको भनाई छ ।
